東亞老闆林建岳前晚喺中環Cipriani搞咗個倒數party，除咗自己一家靚女，包括靚女友陳浥萍、一對靚囡囡林恬兒、林心兒外，傳聞就快加盟嘅葉樹堃一家、李智康梁婉靜一家、龔如心契仔張雁坤同女伴都有一齊happy。林建岳仲話會分紅畀員工，佢話：「都會考慮派bonus，大家做嘢咁辛苦。」
甘比衫靚心情差
甘比生女後一直升呢，做冬坐正，前晚見佢地位繼續穩步上揚，同大劉同車到場，甘比着住皮草、拎埋Chanel鱷魚皮手袋，貴氣十足，不過睇嚟心情麻麻。
倒數完先見到陳冠希出現，不過身邊就冇咗女友楊永晴（Vincy），問佢同Vincy感情點？Edison就話：「非常之好！」至於佢打算幾時喺香港復出，佢就話冇諗咁多，但喺外地佢就一直做其他嘢，上個月先喺美國拍戲。叫Edison回顧吓09年，佢就話：「自己開心最緊要。」要忘記過去？佢話：「每個人嘅過去，造成今時今日嘅自己。」
霆鋒冷待Edison
阿嬌都會出碟，問佢會唔會幫襯吓？Edison就諗咗一陣，之後合十話：「我唔清楚。」佢早排話想同謝霆鋒做番好朋友，不過霆鋒前日接受內地傳媒訪問，就擺明唔領情話：「不可以。」仲話：「男人嘛……過去的就過去了。」