千算萬算，人算不如天算，雖然警方喺西環屯駐重兵，調派數以千計警力佈防，力保第二支管治隊伍、香港權力核心安全，但始終棋差一着，就喺元旦大遊行龍頭抵達西環之際，同一時間中聯辦附近後巷忽然火燭，真正火燒後欄。
或有人掟煙頭引起
遊行隊伍大約下午5點鐘左右去到中聯辦後門，5點12分有人報警指干諾道西均益大廈第二期地下近水街一間鋅鐵雜物房起火冒出大量黑煙，消防車瞬即趕抵現場，派出一隊煙帽隊同開一條喉灌救，火警喺5點34分撲熄，無人受傷。
現場消息指，雜物房由一間冷氣工程公司租用放置工具，火警後雜物房幾乎燒通頂，未知財物損失情況；由於雜物房冇電力供應，故初步調查排除漏電引致起火，但成因未能確定，估計可能係有人掟煙頭所致。
雖然呢單火警好快撲熄，但由於火警現場同中聯辦僅隔兩條橫街，萬一火勢蔓延波及附近大廈，同一時間又有幾萬個遊行人士殺到，不能及時疏散人群嘅話，情況可以話相當凶險，八方身處現場不禁一額汗。
有關方面認為火警冇可疑，八方喺現場視察後卻唔係咁睇。警方對元旦遊行如臨大敵，為防又發生衝擊中聯辦事件，事前肯定佈下烏蠅都飛唔過嘅天羅地網確保中聯辦安全，有乜理由仍然會發生亂掟煙頭引致火警意外？
警方應有高空監視
家陣發生火警，不能不令人質疑警方係咪做漏嘢，抑或係好似懶理公安越境拉人咁放軟手腳。保護香港市民係警察責任，萬一鏹水彈狂徒識穿保安漏洞，由銅鑼灣轉戰西環襲擊遊行人士，八方唔知隻鑊邊個先孭得起。
可能唔想孭鑊啦，有關方面一句冇可疑就想將火警草草了事，噚日現場警員眾多，應該有人負責高空監視，如果佢哋發現任何可疑人物，應該加以偵查，將縱火兇徒繩之於法。只顧防禦遊行人士，卻走漏眼一個煙頭，保護第二支管治隊伍不力呢個罪名，恐怕一哥擔當唔起喎。
mailto:[email protected]