新年進步！祝股友2010年炒股回報跑贏大市，身體健康！一年過去，但對不同類別散戶而言感受卻不一，事關一年前有人同你講港股會否極泰來，兼且大部份時間炒單邊升市，你都未必敢信。所以，09年散戶如在股市捉到路，回報豐碩，當然係難忘一年。相反，若跟錯所謂專家炒股，甚至逢升就沽，隨時輸足大半年。
09年大除夕港股抽升375點，成交達300億元，由重磅股撐起大市。如以半日市衡量，成交量其實算係OK。
金融海嘯已過去，不少股份已收復失地，甚至升凸。星俠去年曾兩次評析滙源果汁（1886），語調都係對其股價表現略感失望。去年3月可口可樂收購滙源失敗，股價由10元樓上大跌至3.88元，劫後餘生之後，兩度反彈最叻都係得6.70元左右。
期內其他公司謀求併購的憧憬不絕，滙源業務又並無大礙，股價都未能出現突破，若然奢望股價重上10元係不切實際，現價只得5.52元，連年中高位6.70元都未到，嚴格來講係滙源股價表現交唔到功課。
方星俠