元旦大遊行今日下午3點起步，八方嚴肅提醒大家，今日遊行路線係由中環遮打道行人專用區出發，終點係西環中聯辦，並唔係慣常嘅由維園行到政府總部，呢點大家千萬要緊記，今日參加元旦遊行嘅人，千祈唔好去維園，嗰度正在舉行工展會，爭取民主、要求普選，釋放劉曉波，唔該過主。
市民唔好行錯路
唔係八方杞人憂天，事實上唔少人以為今日遊行照舊在維園出發，主辦單位民主動力召集人蔡耀昌承認擔心有市民誤去維園集合，所以近日已加強宣傳遊行出發地點在中環。香港人行呢條漫漫民主路已經好多年，希望今日唔好有大頭蝦市民行錯路，否則要趕到中環出發都幾麻煩。
另一個好多人關心嘅問題，係究竟今日遊行有冇dresscode。以往民主派舉辦遊行，大會都會呼籲參加人士着某一顏色嘅衫，2010年元旦大遊行主題顏色係黃色，仲會派發黃絲帶畀遊行人士綁喺中聯辦外，蔡耀昌話歡迎市民穿上黃色衫遊行，當然着其他顏色亦無任歡迎，悉隨尊便。
黃色衫未必人人有，有人在網上呼籲大家着紅色衫遊行，象徵香港人熱熾爭取普選，社民連亦召集「紅衫軍」上街，浩浩蕩蕩殺入西環。民主黨黨色係綠色，黨員同支持者今日會着綠色黨衣上街，又會派綠色絲帶畀遊行人士，抵達中聯辦後就綁在中聯辦外，寓意香港人堅決爭取民主，多年不變。
其實唔理着乜嘢顏色衫，總之今日大家都要上街，紅黃綠三路大軍今日滙聚西環，希望政改真係開綠燈向前發展，唔係好似個廢柴翻叮政改方案咁，假民主原地踏步。一個保留功能組別、容許委任區議員繼續食政治免費午餐嘅偽政改方案，就算通過咗，香港民主有進步到咩？
遊行終點中聯辦
今日遊行終點係中聯辦，蔡耀昌話係有意思嘅，因為大家都知道香港政制發展關鍵在北京，特區政府都話唔到事，所以要遊行到中聯辦直接向北京表態。
mailto:[email protected]