掟鏹水彈狂徒由旺角轉戰銅鑼灣作案，署理總警司、灣仔警區指揮官歐陽照剛除咗加派夥計巡邏外，噚日仲粉墨登場，同一班少年警訊落區派傳單，呼籲市民提防高空擲物。
做過警察公共關係科高級警司、又係飛虎隊首位本地教官嘅歐陽Sir，派傳單似乎唔係強項，一來太多記者採訪，途人怕入鏡避開佢，二來唔少市民對呢位大Sir都好有興趣，不時有人向佢問路，有外國遊客仲請教阿Sir邊度有得鋸扒，內地自由行則問佢邊度有優之良品。咁都未算，有市民竟然要求同飛虎Sir合照全家福，大除夕飛虎Sir有求必應，變成人肉紙板警察，旅發局不妨考慮請阿Sir客串旅遊大使。