商界對於最低工資水平好緊張，總商會調查指訂於6,000蚊就好，再高就會令好多公司執笠，呢個問題今年肯定有排拗。自由黨田北辰前晚出巡茶餐廳實地調查，洗碗散工阿偉話，家陣有月薪6,000蚊都好滿意，另一位女散工則話如果月薪高於此數，會轉做全職。
田北辰話由此可見，最低工資過高會令部份低收入打工仔冇得撈，佢噚日同行會召集人梁振英上電視節目討論呢個深層次矛盾問題，打基層牌嘅梁振英對商界建議將最低工資定於6,000蚊不以為然，認為好多老闆都有能力畀得起更高人工，畀唔畀係「人心」問題唔係「負擔能力」問題，反「呼籲」總商會同自由黨應該積極向老闆宣傳為基層工人加薪，做個良心僱主。