一年之計在於春，對於時/妝人來講，講完「HappyNewYear」之後又是時候準備來年戰衣新妝物。我知我知，早有不少潮流預言叫定大家買呢買哪，新年流流為表小小心意，送你十大2010春夏季時/妝界潮流預覽，畀你睇定來季Trend，攻略式為衣櫃入貨。呢份禮物幫你慳番不少心機，免你做盲頭烏蠅，寫包單死跟一定準過買六合彩。
記者：葉雪芯
裝潮
1 50s高腰平腳短褲
橋唔怕舊，最緊要大家都受。去年與八十年代打得火熱，厚膊方膊玩Rock玩Punk釘晒Studs，個個喊型，似乎一眾時裝界大爺設計師都不嫌老套，再玩大啲，Timeline一再推前，翻叮50s月曆女郎Look。來季大熱高腰平腳短褲，YSL、Blumarine、Prada等大牌齊齊露兩腿！大熱天時露玉腿不出奇，最怕是「肉腿」，做機節食按摩減肥甚至話之你學阿嬌打Botox乜都好，總之甲組腳就趁早搞搞佢。
2 內衣外穿
夏天露肉乃天經地義之事，不過着內衣入睡房此等私人事，來季在時裝界經已變成出得廳堂。眼見ChristianDior、FENDI、Dolce&Gabbana等紛紛以內衣、睡衣作靈感主題作，出到「絕世好Bra」這一招，大家就唔好再咁保守喇，不論胸前有幾両肉都好應該露些少湊湊熱鬧。但講到尾，可能最開心的是男士們，領正牌睇到夠吖嘛！
3 Off-Shoulder繼續煲
去年的焦點簡直就是Shoulder的天下，懷舊厚膊Hit爆，Off-Shoulder亦大行其道。環顧2010春夏時裝天橋，又橫又方又厚的ShoulderPad未見芳蹤，反而Off-Shoulder就繼續有得留低，都啱數嘅，夏天清凉嘛，Versus、Lanvin、Chanel、MaisonMartinMargiela等不約而同齊齊剪單邊膊，各位姊妹可繼續晒靚膊。
4 變奏小女人
上得時裝天橋的Items，一向給人印象不是EveningDress，就是成熟老練的女強人裝。不過各位時裝大帝又點會唔知道女人對年紀最敏感，來季急急腳返老還童，轉玩幾時都合心水又順眼的妹妹仔YoungStyle。斜孭袋、學生Feel、可愛七彩Candy味道統統出齊，唔知你有無興趣學小甜甜紮番兩條孖辮仔襯吓呢？
5 SportyCap
在巴黎米蘭時裝Show上從來都是淑女們的世界，或者大家的意願都係咁，話晒幾萬至幾十萬去裝身，都係想高貴LadyLook見人啫。上回講到時裝大師轉玩YoungStyle，都未算見真章，放棄斯文，出PE衫運動Look，問你服未？Hermès變身網球Look，個個Model十足舒拉寶娃；Loewe、JeanPaulGaultier、Dsquare囗一致玩運動Cap，準備好晒春夏Sunshine，同陽光玩遊戲。
6 NudeColor
由去年延續到今年，Nude色依然是各時裝大師力煲重點之一，看似透薄夠裸又自然的感覺，睇見由心凉到上面。來季重鎚出擊Nude色的第一位肯定是Chloé，幾乎清一色「裸」上陣；由Karl爺主理的FENDI和華倫天奴徒弟雙人組合MariaGraziaChiuri及PierPaoloPiccioli掌舵的Valentino亦無執輸，大賣中和的米、杏、淡啡，唔使下下學o靚模賣肉嘅，想性感，用色帶你透心凉先算得上是高招！
7 恤衫西裝男服元素
上幾季硬橋硬馬般的男裝女着，不是個個受得起，TBLook頂不住不如Soft番少少。2010春夏季睇得出各時裝大師的貼心，將恤衫、西裝元素慢慢滲透式融入女裝之中，例如MiuMiu的三角恤衫領、Chloé的恤衫裙、YohjiYamamoto的西裝款上衣等，在剪裁和下身的配搭上都Feminine了不少，硬朗中有陰柔，來季記得做番個女仔！
妝潮
8 Nude妝
2010春夏一句講晒：無妝勝有妝。此話不是叫你「烏烏歪歪」黃面婆見人，而是來季繼續大熱Nude妝。一覽台上春光，受Nude色時裝影響，裸妝亦一併成為2010S/S妝界之首，Chloé、CalvinKlein、Balmain、JilSander、MaxMara等等，沒有濃妝艷抹，大玩炎夏的薄透自然感，這對各位姊妹來講應該是好消息，至少看上去輕盈不少。大熱天時溶妝溶到五顏六色，你頂得住，見者都難受啦！
9 螢光嘴
大紅、BlingBling等唇色火紅了幾個季度，今季仲有乜好玩先？又估你唔到，螢光Sharp色上位！由Loewe到Prada、AtsuroTayama等追隨，螢光橙、桃紅等色陪晒搶眼，襯眉清目秀的眼妝和底妝，螢光嘴唇形看上更豐盈。
10 黑嘴中毒妝
無錯，差不多十年無見的中毒妝又回來了，可能當年大家都仲未開始化妝，未有感受到那股黑唇震撼。不打緊，來季有排你試。其實上季秋冬經已由Chanel、M.A.C等牌小試牛刀玩黑妝潮，來季正式大浪蓋過來，首先由一班日牌身先士卒，Anteprima、CommedesGarcons、YohjiYamamoto統統大玩白面黑唇中毒樣，型就夠型喇，睇你夠唔夠膽試啫。
