社民連季詩傑上周日被女友刺傷入院留醫四日，噚日大除夕中午出院，右面頰仍貼住膠布，不過精神唔錯，今日可以參加元旦大遊行。
貼波纜全中
阿季出院心情輕鬆，「今日好開心，可以新年前出院，唔使喺醫院過新年。」新年願望係2012雙普選，取消功能組別。不過佢唔願多提女友事件，指案件已交警方處理，不便評論。雖然阿季情場失意，不過賭場得意，留醫期間百無聊賴，半夜都上網睇資料度波纜，可能心無雜念，頭腦特別清醒，前晚度兩條波纜竟然全中，聽佢貼士嘅朋友大讚佢心水準，唔知算唔算因禍得福？
阿季同八方講，其實係有個網友問佢有冇心水，佢見既然瞓唔着，即管睇睇啦，其中一場貼咗蘇超格拉斯哥流浪讓球半，估唔到畀兩場中兩場，笑言朋友應該請佢食飯。被斬反而有收穫，阿季強調只係撞彩，事關平時自己賭都冇咁好運，「希望衰嘢過晒，新一年唔好咁多麻煩事。」