內地股指期貨傳將出台，究竟對內地股市有乜影響，其實大家都係靠估。有人話，出得股指期貨，大陸股市梗係先砌上去，然後先有空間向下玩。
係咪咁家陣冇人知，但如果真係咁又唔拘，因為大陸股市炒上去，港股多少都會受惠，對活躍炒家而言係一件好事。
昨日市傳中央批准推出股指期貨，刺激一眾中資證券股異動，其中以第一上海（227）升得最勁，收報1.28元，勁升17.4%，申銀萬國（218）亦升逾11%，報4.09元；光大控股（165）則升7.3%，報18.86元，表現各自各精采。不過，證券股升勢咁急，散戶反應慢些少都買唔到好價，而高追又怕會坐艇。
申銀萬國上半年純利倒退63%至1837萬元，股價自今年9月開始，走勢都係炒上落為主，期內在3.40元至4.20元之間波動，如果高追可能要捱價。昨日申銀股價最高曾見4.18元，之後回到4.09元收市，有大成交配合，估計仍未炒完，可候股價回至3.85元至4元入市，博升破橫行通道頂4.27元，短線目標4.65元。
方星俠