馮仁昭四圍超：「呢一年同以前好唔同」　斌仔追憶阿梅淚難忍 - 馮仁昭

馮仁昭四圍超：
「呢一年同以前好唔同」　斌仔追憶阿梅淚難忍 - 馮仁昭

舞台巨星梅艷芳（Anita）噚日逝世6周年，約20多名歌迷一早到達九龍塘省善真堂拜祭梅姐，佢哋準備咗偶像生前最愛嘅糕點同食物，又別出心裁訂製名牌皮篋、彩色波鞋、性感內衣等紙紮祭品。至於梅姐兄長梅啟明噚日3點幾攞住鮮花及祭品到場，但佢全程一言不發。
梅姐生前好友羅君左（斌仔）早前因病兩度截肢，噚日佢由朋友陪同前往拜祭，當斌仔念及亡友時，生命鬥士不禁感觸落淚。

一代舞台巨星梅艷芳已逝世6年，佢嘅舞台風采至今仍令人懷念。

梅啟明噚日帶備祭品到場，不過佢全程不發一言。

歌迷九展悼偶像

斌仔慨嘆世事變化無常，佢話：「呢一年同以前有好多唔同，自己好似唔完整嘅人，不過其他fans對我好好，可能愛屋及烏，Anita啲fans有探我同煲湯畀我，真係無言感激，雖然已隔咗6年，但仍然唔捨得佢。」
此外，梅姐歌迷會前晚喺九展舉行「MuiMusicShow慈善夜」，倫永亮做表演嘉賓，倫永亮大談梅姐生前嘅點滴：「佢試過錄《封面女郎》時唱到一半氣喘要飲水。」

梅艷芳嘅忠實歌迷將佢為善最樂嘅精神發揚光大，前晚為偶像舉行籌款慈善夜。