花旗股市前晚發吽哣，道指高低波幅只有36點，收市跌1點，股民好似放晒假，其實港股噚日唔好得好多，期指結算日成交都唔夠500億元，大市靜到暈，睇嚟要放完假之後至有明顯嘅方向。
今日係年結日，港股半日市，「基金股」嘅走勢應該會好啲，不過較宜炒短線。
富士康C輪19822，富士康（2038）昨收8.89元，升1.1%。股價出現技術突破，升破10元睇11元，可以諗吓隻C輪19822。
隻輪現價17.7仙，2010年11月2日到期，行使價10元，溢價32.4%，引伸波幅66.3%，槓桿率5倍（有效2.7倍），正股升上11元，19822有機見30.7仙，超過7成升幅，如果正股跌穿8.20元，就沽咗隻輪止蝕。
俊樺