譚木匠（837）上市第二日依然強勁，喪升16%收市，半新股是基金特別是對冲基金必爭之地，一來今年上市的新股不少都有獨特概念，可憧憬空間大，二來新股圍晒飛兼無蟹貨，升途無障礙自然炒得特別激，睇睇噚日一眾有概念新股，涉及飲食的如神冠控股（829）、通天酒業（389），以及澳優（1717）都有唔錯升幅，看來市場仍在尋寶。
參考港交所股權變動資料，對基金的半新股操作會有較多了解。以傳統基金施羅德為例，本月中以平均價2.38元買入2.6億股春天百貨（331），持股增至7.6%，春天百貨收報3.08元，單計這批貨便勁賺1.8億元，只係兩個星期時間，這些快餐認真和味。
澳優應仲有水位
施羅德近月對半新股情有獨鍾，包括在10月初以每股4.52元增持2222萬股澳優，其後又以約4.40元，力吸腸衣生產商神冠3293萬股，兩隻股份昨日分別收報6.44元及6.84元，計一計數，兩隻半新股的增持部份都賺超過五成。
賺錢真係話咁易？又未必，唔少內房股輸到基金眼坦坦，以上幾隻全是內需與食品有關，揀中行業最重要。以上幾隻新股，澳優應該仍有水位，公司旗下產品定位高檔產品，毛利率超過4成，其內地市佔率僅2%，唔使毛利改善，以量計本來就大有利潤提升空間，澳優預測2010年PE低至19倍，短炒以7元為目標一啲都唔困難。
歐陽風