09年金融海嘯陰霾未去，打工仔仍然捱得好辛苦，渣打銀行慶祝踏入150歲，送畀5,000幾個員工嘅「生日假」，對打工仔嚟講可以話係少有嘅好消息。可惜呢個「甜品」原來賞味期限好快過，因為渣打到家都未公佈2010年會唔會繼續放生日假。
未公佈2010會否延續
渣打銀行員工喺啱啱踏入2009年就收到呢份禮物，全港5,300名員工，今年內生日嗰日可以攞正牌放有薪假，如果生日同周日或公眾假期等重叠，就可留起喺其他日子放假。當時渣打銀行話，「生日假」會唔會成為永久員工福利，要視乎效果同其他因素。
員工當然希望年年有生日假，但截至噚日，內部都未聽到有聲氣延續呢項德政，有員工同八方講，睇怕2010年「生日假」都凍過水。八方曾向渣打查詢，不過冇回覆。如果渣打銀行真係只喺150周年先畀員工放「生日假」，咁佢哋真係要好珍惜，皆因要享受呢個福利，恐怕要等多150年，但係人生有幾多個150年？一個都冇啦，150年一次嘅假期，真係世紀奇遇，罕見過流星雨。
銀行界好興一窩蜂咁做嘢嘅，一間裁員，其他就一定跟；一間減薪，其他就減都減唔切；銀行仲好鍾意一齊向小存戶增收手續費㖭，但講到員工福利，銀行就各自為政，過咗一年，都只係得渣打有「生日假」，未聽過其他銀行有意效法。