呢個世代樣樣都講「多元化」發展，體壇明星想紅到發紫自然都要走呢條路，幫贊助商拍廣告呢條橋已經out晒；如果要搵個至醒例子，首選梗係塞爾維亞嘅「扮嘢祖」迪祖高域啦！佢明年除咗拍電視劇做「塞爾維亞皇帝」外，仲話會同18歲嘅細佬馬高（MarkoDjokovic）拍檔「夾band」，變身「勁爆band友」出唱片賺多筆！
拍電視劇做皇帝
23歲嘅迪祖高域唔單止係網壇「3哥」，佢超凡嘅扮嘢本領仲令佢贏得「扮嘢祖」美譽，扮舒拉寶娃、網壇「壞孩子」麥根萊等都冇難度；塞爾維亞電視台仲邀請佢扮南斯拉夫王國嘅第一任皇帝亞歷山大一世，威到扮傳奇皇帝，迪祖高域都算好嘢！
咁都未算，迪祖高域喺07年法網宣傳片已經大展歌喉，到佢今年4月喺蒙地卡羅網賽晚宴上扮演「KingofPop」米高積遜，雖則佢只係「咪嘴」唱MJ名作《Thriller》，但佢喺台上絕妙舞姿，已經睇到觀眾目瞪口呆。
我求大俠都估唔到，喺網球場上揸球拍叻嘅「扮嘢祖」，揸咪跳舞一樣掂；佢嘅驚艷演出除咗搞到球迷甚為興奮，早前仲吸引到美國網壇雙打冠軍拜恩兄弟，邀請迪祖高域喺佢哋專輯《LetItRip》入面客串rap歌，畀佢正式錄音大展歌喉！
與弟弟、好友夾band
諗頭多多嘅「扮嘢祖」亦可能經過呢次錄音，興起玩音樂嘅念頭，所以平時玩開結他嘅佢，決定以兄弟班出唱片，搵埋鍾意打鼓嘅細佬馬高，同埋一班friend夾番隊band；迪祖高域話隊band仲未有名，但佢嘅球迷與日俱增，出碟時實哄動。
「扮嘢祖」身為網球手又要訓練、比賽，平時嘅賽程已密麻麻，家仲要又拍劇又出唱片，真係精力過人；我求大俠都要寫個「服」字畀佢，亦祝願佢喺新一年網壇、樂壇都有美滿收穫啦！