這一年是「80後」領風騷的一年。由o靚模到一班新進社運分子，顯示呢班廿幾歲後生仔發揮嘅力量唔嘢小，佢哋喺網上說得出，喺現實中做得到，如果冇佢哋，09年可能不一樣，菜園村可能已「被高鐵」，劉曉波應該高興香港有班後生仔與他同在，2010年香港係點唔到「80後」話事，但絕對唔會冇佢哋聲音。
網上動員 百花齊放
84年出世嘅周諾恒，讀完書喺旅行社做個小職員，以前都有參加7.1遊行、六四集會，今年覺得要「做啲嘢」，毅然喺六四前夕召集網民去西環中聯辦外靜坐絕食，成為投身社運處男作。絕食完，六四未平反，不過他認為已經「做到嘢」，反對高鐵撥款一役是里程碑，「可能最初只係幾個人企出嚟，但引起公眾關注，大家開始留意件事，終於阻止到（撥款）。」
同上幾代社運分子例牌簽名、遊行、絕食三部曲唔同，「80後」擅長網上動員，形式百花齊放，「家會拍埋宣傳片放上網，做軟性宣傳，以前冇呢啲手法。」佢預期2010年「80後」社運有激進化傾向，「唔係要暴力或者肢體衝突，可以係留守政府總部，以前嘅方法已經冇用，改變唔到不公義嘅社會。」
「80後」站出來之際，「90後」亦蠢蠢欲動，91年出世，年僅18歲嘅余一心，星期日有份去羅湖闖關，三個月前才處女下海參與社運，同朋友一齊去民建聯紅色搖滾演唱會踩場，佢話拉橫額、嗌口號感覺新鮮，「不過我哋絕對唔係兒戲，因為一舉一動都影響好多人。」
一腔熱血 未覺犧牲
「80後」、「90後」係講求個人主義嘅一代，搞社運亦唔需要有人吹雞，「闖關係圍內人自發性提出，喺facebook有人話要聲援劉曉波，大家就決定闖關。」參加社運有代價，周諾恒兩度上差館，幸未被檢控；余一心未有這些經歷，一腔熱血覺得搞社運冇乜犧牲，「我哋可能真係改變到個社會。」
最sweet
麥嘉軒融化中大校長
過去一年，香港政界似乎偏愛翻叮，政改方案固之然係翻叮貨色，兩個男議員曾鈺成、涂謹申都做翻叮新郎哥，喜得第二春喺年尾再婚，成為政圈佳話。
劉遵義變開籠雀
來年最矚目喜事之一，應該係中大校長劉遵義同哥哥張國榮外甥女麥嘉軒結婚，上星期二劉遵義喺校長寓所漢園宴請其他七大校長，賀科大新校長陳繁昌上任兼預祝聖誕節。當晚麥嘉軒都有到，以準女主人身份招呼客人，事後中大發出一張大合照，應該係官方首次發出兩人合照。
城大校長郭位同八方講，劉遵義平時金口難開，但一見到麥嘉軒卻成個人唔同晒，好似開籠雀咁風趣幽默十分健談，郭位話相信因為咁吸引到麥嘉軒，劉遵義就係靠把口奪得芳心。劉遵義2010年退休，郭位上任一年半仲有排做，來年會繼續派教職員到海外深造，城大籌辦獸醫學院進度不錯，已收到唔少捐款。
最威水
光纖之父成就獲肯定
高錕（圖右）09年先獲得諾貝爾物理學獎，有人慨嘆係遲來嘅加冕，八方覺得換個角度睇，咁大成就嘅科學家，完成咗一個改變世界嘅任務，從頭過另一種生活，或者都未嘗唔係一件好事。
有人笑言「光纖之父」亦係宅男、電車男之父，若果冇光纖令寬頻進屋入戶，又邊可能有宅男、電車男誕生？「80後」更要多謝高錕，因為家陣嘅網上政治動員，喺facebook整個group就可以串連全世界，都係多得光纖嘅幫忙，如果冇咗呢個途徑，「80後」肯定唔可能輕易令政治生態起咁大變化。
最神怪
陳振聰自揭陰私爭產
小甜甜爭產案由08年延續到09年，而且高潮迭起，審訊期間大爆陳振聰（圖）與小甜甜嘅非一般關係，龔如心叫陳振聰做「老公豬」，陳振聰大讚龔如心「真係好靚」，無不令人O嘴；更奇係原來唔少名人富豪都迷信挖窿種生基呢啲神怪嘢，令風水師繼律師、建築師、醫師後，成為又一令人艷羨嘅專業。
爭產案預計明年初有判決，陳振聰擺出唔志在姿態，去咗外遊散心；華懋方面，龔仁心棄醫從商，以話事人身份進駐如心廣場新總部，遺產戰，打到2010年。
最出位
陳一諤為屠城論落台
都話09年係「80後」出風頭嘅一年。港大學生會前會長陳一諤（圖）公開話北京血腥鎮壓學生只是「有啲問題」，質疑屠城真偽，咁樣講法，真係好有問題。
選擇站在當權者一方，即係脫離群眾，港大學生會後來舉行公投，成功拉佢下台，令佢成為港大學生會成立97年來首位被公投罷免嘅會長，同中共一樣，惡行青史留名。陳一諤早兩個月卻忽然主動申請到公民黨梁家傑議員辦事處做實習，令人頭。唔知大家仲記唔記得香港青年發展網絡召集人呂智偉？佢指八九學運「變質」導致屠城，可惜佢曇花一現。
最乞人憎
曾蔭權扮代表犯眾憎
「我嘅意見，就係代表整體香港人嘅意見！」如果要選09年最乞人憎金句，唔使公投，八方相信自有公論，非曾蔭權（圖）5月中喺立法會回應平反六四事件時一番扮代表言論莫屬。
今年係六四事件20周年，議員質問煲呔是否仍堅持平反六四，煲呔卻指89年後中國經濟成就驕人，香港都有得益，相信市民對六四事件有客觀評價，堂堂特首被金錢埋沒良知，激發泛民議員集體離場抗議，市民嘩然，全城話「曾蔭權不代表我」，視民望如浮雲嘅煲呔，求仁得仁。
最狡辯
甘乃威示好感≠示愛
捱足十幾廿年先出頭晉身立法會嘅甘乃威（圖），因為炒女助理魷魚而街知巷聞，成為全香港人茶餘飯後談論焦點，比起佢頻頻上街幫雷曼苦主仲大件事。
其實喺辦公室搞地下情冇乜大不了，試問邊個office冇發生？搞到咁大鑊，學佢自己話齋，應該都係衰性急。
求愛不遂，可以繼續做朋友，花多啲時間慢慢培養感情唔得咩？火遮眼咪出事囉，仲要面對被立法會審。
八方覺得成件事入面，甘威竟然指表示好感唔等於示愛，簡直係顛覆正常人對於何謂求愛嘅觀念，堪稱09年狡辯之最。
最反斗
事旦男狙擊CCTVB
物極必反，一台獨大多年嘅無綫電視TVB，今年終於受到挑戰，自稱姓李、堅拒透露真正身份嘅「事旦男」（圖），今年六四，趁TVB喺燭光集會場地維園做直播時，忽然舉起寫上「無綫新聞，事事旦旦」嘅紙牌，喺記者方東昇身後出現，喺鏡頭前向數以百萬計觀眾批評無綫新聞，真正創造傳奇一刻。
事旦男突襲令TVB高層震驚，更震撼全香港，TVB亦被謔稱為CCTVB。事旦男出擊，令廣管局進行嘅免費電視牌照中期檢討受到更多市民關注，檢討幾個月後有結果，到時睇吓TVB有乜改善啦。
mailto:[email protected]
