今年賣天匯創出癲價70,000蚊呎嘅恒基四叔，賺大錢都冇忘記獎賞下屬，八方聽聞四叔今年極度豪爽，破業內歷史性紀錄大派癲價30個月花紅，一次過出兩年半人工，八方難以想像感受如何，相信一般打工仔發夢都冇咁大想頭。
高級經理攜眷遊海南島
恒基已擇定吉日下周一明年1月4日發花紅，當然唔係人人有幾十個月花紅啦，知情者稱，應該只有極少數人獲30個月花紅。由於恒基今年賣樓業績理想，加上四叔喺股市收復唔少失地，集團內部估計攞到30個月花紅者，不出財務投資或樓宇銷售兩個部門，而其他部門同事，有10幾個月至20個月花紅嘅都唔少，普遍則係一個月，亦有極少數表現太差嘅冇得分。
四叔有嘅係錢，所以唔待薄夥計，07年樓股齊鳴，公司上下平均獲9個月花紅，08年金融風暴，唔減薪兼有雙糧出，今年仲豪，除咗派錢，仲會請50個高級經理或以上職員攜眷共100人暢遊海南島，四天豪華團全包宴，住五星級酒店，仲可以免費打高球同做Spa，其中一晚重頭節目係包起泳池舉行池畔BBQ派對，真係住得舒適，食得招積。
如果唔得閒去海南島，可以攞四張海洋公園門票留港消費，一家大細去玩啱晒。咁豪爽慰勞員工，並唔係慷小股東之慨，原來四叔好均真，豪華團同海洋公園門票都係四叔自掏腰包，並非入上市公司數，據講佢認為自己真金白銀請同事先至係有誠意，所以唔使股東錢咁小家。
去年暫停請管理層外遊
其實四叔習慣每年邀請管理層去旅行，舊年下半年雷曼爆煲兼金融海嘯，業績唔好，股市又大瀉惟有停咗一年，不過因為舊年8月北京奧運恒基係大贊助商，喺鳥巢有個包廂，所以四叔請咗管理層上京睇奧運賽事，包廂內全部飲食免費，由於食物質素一流又招呼周到，據講竟然惹來一個來歷不名女子混入包廂大吃，後來畀保安人員發現先叫佢過主。
mailto:[email protected]