劉曉波被判監十一年，所犯何罪？無非係簽署「零八憲章」及係發起人而已，與清朝光緒二十一年（1895）之「公車上書」本質上無甚分別，故此中共之打壓亦與帝皇時代冇分別。一部虛構故事電影《十月圍城》正在上映，講的是清廷派人來港刺殺孫文，幾位朋友睇過，一致推薦，話值得一睇。孫中山最後革命成功，推翻滿清建立共和又如何，一百年後，中國領導人仍然在北京皇城辦公，仍然容不下反對聲音，而香港呢？仍然是聲援內地異見人士的基地，當年《中國日報》（位於當今陸羽茶室地址），大力支持孫中山，毫無懼色也。大家睇《十月圍城》之時，唔知會唔會諗到香港在近代中國史所發揮嘅影響。
香港亦有人簽署「零八憲章」，聽講近年靠內地演講、媒體節目竄紅者，已遭打壓，節目難保，講座要臨時取消。好似舊年有人話香港並非發展文化嘅地方，以後會放棄香港，到內地開闢新的活動空間。現在呢，當應了解內地大陸有文化禁地，須要高度自律先至可以搵食，千祈唔好誇誇其談。
沒有自由思想的國度，可否憑一紙公文就可發展成為國際金融中心？近年不少人屢屢發出警告，指出上海會取代香港，上海會係中國之紐約，香港最多係中國波士頓，外國人亦有相同睇法。劉曉波事件或者令外國投資者反省，中國經濟增長雖然快速，但愈是經濟發達，愈是突出了保守政治與市場經濟並不調和，中產階級的湧現，遲早會引發民主人權的訴求，把維權律師與爭取民主的文化人關起來，不會長期止得咳，內地亦有人質疑，上海缺乏「震撼力」與「感召力」，創作力不足，思想保守，行前半步又停半步，能否成為金融中心，大有疑問。
歷史上，從未有一個處於非民主國家，倚賴中央規劃之城市可以成為國際金融中心，上海會否成為特殊例子？左丁山以為到目前為止，香港仍然具有比較優勢，唔使驚佢，如他日特區政府學足澳門，講高度自律而唔係高度自治，咁又另睇嘞。