李克勤出新碟，無綫因為封殺環球，對克勤宣傳新碟不聞不問，昨日未有派人到場採訪。克勤更擔心來年世界盃的主持一職會凍過水，所以他懇求說：「希望大家唔好搞太耐！」
李克勤昨日在黃竹坑一個錄音室舉行新碟發佈會，日前無綫記者訪問謝安琪被拒，所以昨日無綫連契仔李克勤新碟發佈會都沒有派人到場採訪，相反有線拉大隊派出兩隊採訪隊到場。以往力撐契仔李克勤的無綫，都捨他而去，搞到克勤最近在多個公開場合呻自己新碟宣傳少，他說：「呢個係事實，我係第一個歌手被cut，幾傷心呀！嗰日喺屋企睇李樂詩喺CASH度唱歌，我就好得閒喺屋企湊仔。」
「唔好搞太耐」
契媽同米飯班主不和，克勤固然心痛，他會否做個和事佬，克勤說：「我何德何能！」記者直指他是無綫契仔？他說：「呢個問題唔係我一個可以講，係議價問題，冇人唔啱！歌手理唔到，我係公司團隊一分子，都會支持公司，總之商業性嘅問題係冇辦法改變，我亦唔覺得歌手同TVB之間會出現問題，大家私下係朋友。」克勤更強調自己對無綫的忠誠，更會每年跟無綫簽歌星合約，他說：「我係最順攤嗰個，同TVB好多年感情，老朋友。」
克勤是第一個被停騷的歌手，契仔地位不保，新碟又不夠宣傳，但是他最擔心的應該是明年的世界盃，以往他是其中一名鐵腳主持人，他說：「唔知呀！咁多個月，等生咗先講喇！凡事總有解決方法，希望大家唔好搞太耐！」
採訪：楊潔雯
攝影：仇志德