私隱專員吳斌啱啱先喺立法會帳目委員會聆訊解畫，力陳自己冇大花筒，話口未完，私隱署好可能會唔見400萬。不過今次唔係吳斌大使，而係打大老虎打到入肉，好似用崆峒派七傷拳咁搞到自己都內傷，代價唔細。
向公署獅子開大口嘅公司叫做國泰，話說喺05年，國泰要求長期或經常請病假嘅機艙服務員披露過往12個月相關嘅醫療資料；私隱專員認為國泰咁做有威嚇成份，國泰向公署行政上訴委員會上訴被駁回，再提司法覆核，結果法庭叫私隱專員重新考慮呢單case。
雖然國泰最後肯微調有關政策，不過就向公署追討訟費約400萬元，約等於公署兩年盈餘。據講雙方仍在講數，若果國泰肯收順啲，吳斌就冇咁傷。