鄭秀文（Sammi）演唱會嘉賓如雲，前晚她邀請張學友和梁詠琪（GiGi）擔任嘉賓，除了拖學友獻唱外，穿上7吋高踭鞋的Sammi還同台火併高妹GiGi，兩女公然咀嘴，乾涸Sammi男女通殺，一晚滋潤晒！
鄭秀文合共10場的紅館騷前晚舉行第5場，其間她自爆開騷前患上感冒，連日來靠中西藥雙管齊下頂硬上，原來她早兩日已喉嚨發炎，前晚更聲沙，開場前還不太能開聲，及至上到舞台，Sammi仍落力獻唱，表現出應有水準。
Sammi每晚邀請不同嘉賓助陣，前晚輪到張學友。Sammi透露致電學友時，他二話不說答應，Sammi向學友笑說：「你同我頂半個鐘我咁挑剔鍾意完美，聲沙真係驚驚哋，不過家我學識咗不完美中的完美。」學友隨即讚她：「嘩，果然係高咗，層次唔同咗。」
學友笑謂自己爽快答應做嘉賓，原因是想撲飛，他說：「今日仲有朋友問我，買唔買到Sammi飛，我連自己做嘉賓都唔敢話佢知，一陣佢問我攞飛都唔知點答人好。」最後他拖着Sammi合唱《李香蘭》，又獨唱《我真的受傷了》和《還是覺得你最好》。
祝安仔開花結果
梁詠琪和鍾鎮濤也有捧場，Sammi安歌時拉GiGi上台，GiGi卻自言沒準備，Sammi即笑她：「你睇你化晒妝，扮到咁行，仲話冇準備，你平日起身就已經咁樣啦咩？」其後兩女在台上咀嘴，Sammi又說：「你咁鬼高，我着7吋高踭鞋都唔夠你高。梁詠琪係我好朋友，呢個人，成日叫佢再作歌畀我，又唔作。」二人及後合唱《落錯車》。
個唱中Sammi重提日前舊愛許志安上台，現場觀眾即大叫安仔名字，Sammi說：「已經過去式啦，唔會返轉頭，咪叫來叫去都係一個名至得，人哋有女朋友。佢哋可以開花結果，我都會戥佢哋開心，恭喜佢，講到咁明，大家明晒啦。」
此外，有人在Yahoo!拍賣網炒賣Sammi於除夕舉行的演唱會門票，原價560元兩張，現叫價至1,000元。Sammi在個唱中推出售價為480元的HelloMi13吋限量版公仔，在網上也炒至780元一個。撰文：丁寧
話你知：Sammi演唱會嘉賓勁
12月24日：劉德華
12月25日：鄭伊健、葛民輝
12月26日：許志安
12月27日：李克勤
12月28日：張學友、梁詠琪
12月29日：王菀之
12月31日：何韻詩
1月1日：待定
1月2日：任賢齊〈圖〉
1月3日：TheBigFour（許志安、張衞健、蘇永康、梁漢文）
