羅力威參加緊《亞洲星光大道》時，原來亞視已經同佢簽咗經理人合約，到佢拎埋個比賽冠軍，亞視就想捧佢做真正歌手，噚日仲喺大埔比華利山別墅借咗個成億嘅示範單位畀佢拍新歌MV《現實不重要》，首歌仲係佢親自創作嘅，請埋參加過台灣《超級偶像》嘅張誠菡做MV女主角，另外仲有一班「星光家族」成員一齊演出。
大獻殷勤
羅力威拎完個冠軍獎之後，即刻俾人話佢態度寸，但噚日見佢對住張誠菡又變得好親切，做訪問時主動要求留喺張誠菡身邊幫手做繙譯，但係當佢哋一齊影相時，原本伸手搭住個女仔膊頭嘅佢，又即刻有啲怕醜咁縮開隻手，態度都好飄忽。羅力威就話MV劇情都係彈琴唱歌，同張誠菡冇親密接觸，但會聽晒導演話。
等出唱片
聽講話羅力威比賽中途未係歌手已經有fans，可惜亞視冇乜嘢製作，如果唔係部部劇都可以畀佢唱主題曲，而且仲一手包辦埋創作，慳水慳力。羅力威話作作埋埋已經有40幾首歌，第一個目標係出自己第一張唱片，不過暫時未簽到唱片公司。