特首引述總理溫家寶嘅「喜訊」，話正在探討以人民幣直接在港投資嘅可行性，即係唔再需要將人仔先兌換成其他貨幣，再滙入香港投資，而直接用人民幣結算。
雖然呢次講明，投資只限於併購、設廠等實業性投資，唔包括股票等非直接投資，但正所謂上有政策，下有對策，內地企業一樣可以透過併購香港空殼公司炒樓，反正用空殼公司買樓越嚟越普遍，到時更可以攞正牌引入內地水源。雖則話唔畀用嚟炒股，咁併購控股公司又點，咪又係可以直通南下大炒特炒。
有冇留意，近年香港幾乎各大小證券行都紛紛以財星股評人作招徠，差不多每星期都要北上搞投資講座，可見內地客係兵家必爭之地，至於水源何來，大家心照不宣。上水啲舖位咁貴租，除咗水貨客多之外，有唔少都係經紀行租嘅地舖，主力招呼內地客。有行家話呢班客好招呼得多，至少夠豪，從來唔會㩒佣，呢頭開完戶，嗰頭過關返到屋企就可以上網開機炒。
北水來港投資渠道多
其實家網上世界咁方便，點解仲要開地舖咁重皮？原來內地客仍停留喺上世紀港人心態，要見到地舖至覺得踏實，起碼出咗事都知去邊度追。
特區政府無錯將香港定位為人民幣離岸中心，擴大人民幣發債規模，但速度奇慢，而且參與嘅試點以國企為主，代表性有限。
此外，仲要小心人民幣直接投資下，將進一步強化香港作為全球黑錢洗衣機嘅地位，好處當然係帶旺經濟，唔好處係香港隨時再被國際社會「祭旗」，影響金融中心形象。
胡孟青