昨日兩隻新股上場，譚木匠（837）由頭帶到落尾，以全日最高位3.93元報收，較招股價高出52%，這家從事賣梳的公司發售股數僅6250萬股，賣點是散戶唔易抽中，一手中籤率僅4%左右。至於另一隻新股德國塗料生產商星亮控股（955）則高開低收，報37.70元，高出招股價不足2%，計及手續費得個桔。
譚木匠產品雖極富傳統中國文化特色，但賣梳與木製飾品這類手作製品，竟然可以大炒特炒？相反星亮是德國200年老店，行業技術出眾，其符合歐洲環保標準的水溶性塗料只是少數生產商做得到，多家著名豪華轎車廠及國際主要手機生產商如三星及LG均為其客戶，預測PE低至8倍，如此背景，股價表現竟與譚木匠差天共地，只能歸因於貨源落在誰手。
估值貴唔係問題
說到增長，星亮去年完成收購上海、惠州及天津廠，令今年上半年中國業務比重增至24%，目標兩年後中國業務超過歐洲，到時大可改名星亮中國，鬼佬或會更Buy。
市場口味難料，不過半新股中暫時最有賣點應數中國玉米油（1006），昨升13%，收報6.13元。炒通脹預期柴米油鹽樣樣加，食油亦唔例外，玉米油加添健康食用油概念，而且有自身品牌毛利上望空間大，更易吸引熱錢買上。估值貴唔係問題，春天百貨（331）估值貴到離奇，依然長炒長有，最重要係憧憬古仔是否吸引。
歐陽風