聖誕日一個經驗豐富嘅男領隊，被中年女團友指非禮，仲報警追究，呢單案件引起好多領隊關注，有人喺facebook開咗個group「為領隊平反，保護領隊尊嚴」，聲援男領隊，已經有近1,500人加入。
擬遊行促撤功能組別
八方喺網上睇到，唔少加入呢個group嘅都係領隊或旅遊業界人士，有人擔心涉案男領隊生計有問題，表示如果佢提出，可以呼籲同業幫忙籌錢解佢燃眉之急咁話。
唔少網友大吐苦水，指近年旅客要求越來越過份，領隊吃力不討好隨時被投訴，「一定叫仔女唔好做領隊」。有網友又話旅行社高層、旅遊業議會偏幫旅客，從來冇為領隊爭取合理權益，旅遊界議員亦然，因為領隊唔係功能界別選民，建議領隊參加元旦大遊行，爭取廢除旅遊界功能組別。
發起group嘅網民就回應，上街嘅話恐怕較為複雜，所以暫無意組織網民遊行。其實元旦遊行人人都可以參加，受夠寃屈氣嘅領隊，一於上街爭取代表自己嘅議員啦。