巴士迷、火車迷……總有人會為某類車款而着迷，今次主角Tommy，消防員，有點理所當然，係個消防車迷，佢唔止愛收藏消防車，仲要自己動手製！15年嘅消防員生涯中，共製作了過百部模型消防車，最難得嘅，係嗰種堅持。
記者：許維雅
攝影：周旭文
整得靚靠影相
竹園村木屋區長大嘅Tommy，細細個已經成日見住啲消防員出出入入，埋下消防情意結。8、9歲開始已經喺舅父仔薰陶下整模型消防車，「舅父仔成日話香港嘅消防車其實好靚，但市面賣嘅模型車都只得外國貨，於是教我用紙皮同膠片改裝消防車仔，嗰時已經覺得好好玩。」到18歲立刻跑去考消防員，第一份工就做了15年。15個年頭嘅公餘時間，都放咗落改裝消防車上，「後來識得改裝得更專業，係全靠一位做輔警嘅師傅教我，佢就專改警車款。於是學識計比例，每件配件、每個位置都係1:87。消防車配件比警車多，更難整，好彩返工經常接觸得到，比一般人更多了解。我會影相研究度尺，通常影得越多相，資料越詳盡，整出嚟嘅效果越靚。」
最搶鏡機場車隊
最貴係拉花
Tommy家中儲了四百架消防車模型，過百架自製消防車仔，今次帶來超過50架像真度極高嘅1:87香港版消防模型車做訪問，雖然架架得半隻手掌般大，但裏裏外外一絲不苟，極之細緻。有由三架模型車裝嵌成一架、有用了半年時間完成、有加重底架以平衡升降梯重量。「每次出新車我都好興奮，即刻去研究，鎖定目標後開始影相。整1:87嘅模型車，係因為車款夠多，最容易搵到適合嘅配件。」駐守機場4年嘅Tommy，作品當中以機場消防車隊最齊全最仔細，包括機場截擊車、機場泡車、喉泡車及16米無積升降台（刺針式），再加架救護車，齊晒。不過最估唔到就係成架模型車最貴係車身拉花，「搵人整菲林印刮字每張$150至$200，想慳啲，最好等齊幾架先去整，不過通常都唔得，哈哈。」
1. 買架最似樣嘅模型車，留車頭，將車尾切掉。
2. 燈、鏡等配件可以搵其他1:87模型車拆出來安裝。
3. 車身用膠片砌成，一般模型店會有售。
4. 鐵籠、金屬面可以去五金舖買鋼片製造。
5. 雲梯用膠條砌成。
6. 經常出現嘅配件可以先用矽膠整個模出來，再用PU手辦膠倒模複製。
7. 由於車仔比例細，噴油工序唔算太繁複。
8. 用電腦設計好字款尺寸，整貼紙絲模刮字上去。
鳴謝：國際車迷會（26289911）