中聯辦「鐵欄花」保安周大姐喺聖誕當日斥罵示威者仆街、響朵自稱共產黨員，仲涉嫌用鉸剪剪傷示威者隻手。西環旗下一名保安員都惡到隻手遮天，好多網民相當憤慨。唔使一日時間，呢位周大姐就俾網民起底，話佢大有來頭，曾有示威者同佢交鋒後受傷，不過警察都係做唔到嘢。
據稱呢位保安個名叫周鵬惠，去年8月一位名叫劉惠卿嘅法輪功請願人士報稱俾一把雨遮打傷，周鵬惠拒絕道歉，仲報稱被打。支聯會噚日再去中聯辦示威，黨員周大姐潛水冇影。不過另一位戴住手套、孭住大聲公嘅男保安都相當彪悍，不時開咪警告示威者，又大大力將請願物件由中聯辦拋番出街。亂拋垃圾，現場近百警察都當睇唔到。