生命鬥士羅君左（斌仔）早前專程向醫院請假，到沙田為歌唱比賽擔任司儀，之後佢繼續返九龍醫院嘅康復大樓休養。噚日下晝兩點幾，斌仔坐輪椅由護士推落去樓下照X光，原來係為佢即將裝義肢而準備，咁啱佢好朋友林偉嚟探佢，仲帶咗唔少禮物送畀佢。
林偉寒天送暖
原來林偉帶咗唔少襪同頸巾畀斌仔，佢話：「斌仔話覺得好凍，所以我咪帶呢啲嘢畀佢保暖。」照完X光之後斌仔同林偉返上病房傾吓偈，林偉仲倒湯畀佢飲，見斌仔胃口都唔錯，唔怪得知佢精神都越嚟越好。
飲完湯之後斌仔就去1樓嘅義肢及矯形部見醫生，商量嚟緊裝義肢嘅細節，雖然義肢未有咁快可以裝上去，但係斌仔已經繼續開始投入工作同正常生活，嚟緊星期六佢會出席朋友嘅婚禮，之後下星期就會現身一個講及健康嘅活動，呼籲所有人要珍惜生命。問到聖誕節點樣過？斌仔話：「留喺醫院過，當日仲同其他病人同醫生護士開咗個聯歡會，我仲表演唱歌㖭。」