09年剩番幾日，舊嘅唔去新嘅唔嚟，但有啲嘢好應該帶埋過年。好似河蟹曾涉嫌向女青年會施壓調走社工謝世傑嘅事件，泛民議員認為唔應該不了了之，立法會內務委員會已經排咗喺1月8日嘅2010年首個會議，討論成立專責委員會徹查事件。
謝世傑噚日喺電台節目，好包容咁用「愛」呢粒字嚟形容女青年會，因為佢嘅社工之路係由女青開始。話說佢中三被踢出校，跟朋友去社區中心，因此接觸女青嘅社工，覺得呢份工好有意義，回頭去讀書，學成後去女青做嘢。03年申請入大澳，結果爆出河蟹事件。展望2010，佢話會參加一個民間組織，仲話會緊記公義。