大埔白石角賣地成績雖然係市場預期下限，但以呢個「麪粉價錢」，日後樓面呎價要賣1.5萬元以上，充份凸顯香港土地資源有限。
星俠雖然唔係炒樓專家，但個人對呢次賣地成績十分滿意。家陣全城言論都認為經濟已走出谷底，若然打工仔收入有明顯增長，相信明年樓市升勢將遍及中小型樓宇。
聖誕節長假後股市重開，但港股表現差強人意，恒指先升後跌，收市報21480，跌36點。大市雖不濟，但仍可炒個別，其中半新股表現突出，中國太平洋保險（2601）及昨日推介的中國玉米油（1006）都創出上市以來新高。
12月大市氣勢麻麻，中國龍工（3339）月中隨大市向下，兼有鄧普頓沽貨，股價曾跌穿4.70元，但上周跌勢喘定及重新向上，昨更升逾3.9%，收報5.30元，料基金減持已告一段落。
龍工研發新技術有效降低生產成本，產品銷售量理想，加上鋼材價格穩定，有助推動盈利，股價有力再試12月高位5.60元，中線可見6元，不妨伺機跟進。
方星俠