飛走解碼器　PS3遙控睇英超

飛走解碼器　PS3遙控睇英超

假如客飯廳加埋得幾十呎，又想裝齊機頂盒兼遊戲機，同時又錄又玩，只怕連散熱空間都未必夠！慳位有好多辦法，其中之一係買部PS3返嚟，打機兼埋煲碟，佢最近仲同nowTV搞Crossover，睇波睇戲全由PS3直出，唔再用解碼器，少咗部機，間屋又企理咗。想試玩？明年第一季就有！

記者：陳國輝
攝影：伍慶泉

透明介面　裝程式即睇

你以為PS3會學FinalFantasy咁，走去推出一款nowTV特別版？當然無咁誇張！查實不論新舊PS3用家，只要Firmware升級上3.10，咁就睇到nowTV。而所謂嘅「解碼器」，實情係軟件程式，直接上網單撈就得，佢會喺XMB介面上生成一個電視Icon，一Click入去就睇到；正式收睇節目前，仲要記得上PSN登記資料，再搵專人上門安裝寬頻線。首次安裝都幾煩，至於有關月費仍有待公佈。
因測試版關係，記者所見，PS3介面內只有一個簡單電視Icon，Click入去，約需時八至十秒連接，成功後就立即出現now100台，開機速度唔算好快。但值得一讚係，PS3版now介面採用全新設計，例如顯示節目資料、全日節目表等訊息時，會出現一個半透明方塊，美觀之餘，背景節目亦同時播放；唔似以前得個橙色畫面咁悶。

■全日節目表以半透明方式顯示，都幾美觀。

■節目播咗幾耐都睇到，連字幕、聲軌都有得揀。

■想睇邊個台，直接上網購買收費頻道就得。

手掣選台　爽過機頂盒

當然，節目內容啱唔啱睇，呢點先最重要！但選台以及一般操作，亦唔可以忽略。今次改用PS3手掣操作，比起傳統Remote，最大優點係飛走紅外線技術，改用藍芽接收，就算前面有嘢阻隔，都一樣操作無誤，而且直接選台或轉台陣，反應亦比之前爽快；不過，由於手掣上無任何文字識別，加上不設數字鍵，想好熟習咁使用，難免要花多少少時間。
至於本身內置喺nowTV嘅互動功能以及錄影服務，電盈話要到第二階段先落實推出，如果等唔切想睇英超，梗係申請咗先講啦！

■幾乎每一粒掣都有獨立功能，好難記得晒。

■於藍芽範圍之內，你可任意操控揀選節目。

■想直接選台嘅話，左邊會出現數字鍵盤。

現場試播

■睇咗《nowSportsHD》約20分鐘，畫面好流暢，亦唔覺有起格或者窒機情況。

■近距離睇吓西班牙靚仔費托，解像度一樣行720p，亦都無乜起格喎！

■《DiscoveryHD》色彩豐富，只可惜仍然去唔到1080p。

■《新聞台》同以前咁，無高清不特止，畫面Cut淨四分三，無進步過。