所謂英雄難過美人關，地鐵救火英雄季詩傑前日被女友涉嫌揮刀斬傷後，唔少阿季嘅朋友都大為緊張。但可能季詩傑見慣風浪，雖然心口、左臂同右面頰中刀，但噚日晨早7點，留醫嘅佢就已經上網玩facebook，睇嚟康復速度唔錯。
社民連出名網上fans多，唔少網民喺阿季身中三刀新聞出街之後，紛紛湧上facebookadd阿季做朋友，真係無端諯變咗三刀拍案驚奇；對近排力推五區公投，不時喺網上動員網民撐場嘅阿季嚟講，咁樣都可能算係一種安慰。
水蛇春咁長嘅網民除咗祝阿季早日康復外，亦有人不忘同阿季玩黑色幽默，指阿季成為「刀疤季」後，日後會更有氣勢，亦有人替阿季不值，指阿季「不幸地愛上了一件港女」。有阿季朋友就話阿季好勁，《蘋果日報》要聞都有成三篇文章報道佢單嘢，阿季不但冇嬲仲抵死回應：「我片你幾刀等你見報呀！」
「愛是恐怖主義嗎？」
喺出事之前，阿季咁啱喺facebook留低一句「愛是恐怖主義嗎？」，事發後卻又好緊張女友，即時急call好兄弟加黨友陶君行幫手，搵律師保釋女友外出。長情嘅阿季噚日亦未有更改喺facebook嘅感情狀況，RelationshipStatus仍然係「交往中」。
但喺醫院咁悶，一向愛讀《三國志》嘅阿季，喺facebook公開呼籲「有咩好書介紹呀？唔想淨係瞓！」一班網民加好友即時發揮群眾智慧，有人叫阿季睇《蘋果》報道，唔少網民更別出心裁，向阿季推薦多本「攞景」系列好書，包括司馬遷《史記》裏面嘅〈刺客列傳〉、《男女大不同》同網路小說改編版《我的野蠻女友》，最好笑係有疑似社民連fans叫阿季睇吓劉迺強嘅文章，話包保阿季死咗都激番醒喎。
正在養傷嘅阿季噚日下晝又十分搞鬼，用手提電話影低自己喺醫院嘅「人間美食」，貼上網同網民分享。睇真啲，原來係一包香葱薄餅咁大把，睇嚟住院嘅阿季暫時都係冇啖好食。
mailto:[email protected]