煲呔上京拜見阿爺，係佢嘅「浮雲指數」勇創新低之後，首次向中央領導人述職，咁嘅形勢下面聖，少不免心神恍惚靈魂出竅。果然，煲呔喺鏡頭前同胡錦濤交談間，明顯九唔搭八。
無端端再講東亞運
胡錦濤噚日提到香港各方面事項，阿爺話希望特區政府同心同德，穩定金融，發展經濟，同時妥善處理好政治發展問題，保持香港和諧穩定。唔知係因為阿爺講嘢太過老生常談，悶到煲呔半睡半醒唔知點應對好，定係煲呔淨係識跟住手上張貓紙讀，煲呔回應時無端端講咗去東亞運，又話香港隊攞到足球金牌。
或者傳奇一刻令煲呔亢奮到家都未調整到，又或者眼見東亞運成績刺激到特區政府民望回升，當晚喺大球場抽完水仲未識收，上到中南海仲要抽多嘢。胡爺爺保持中共領導人一貫蠟像作風，繼上次去澳門聽住崔世安表演「笨忍」忍得笑之後，聽到煲呔九唔搭八都泰山崩於前而色不變。
又或者，煲呔真心以為，搞場東亞運就可以解決到阿爺所講嘅甚麼深層次矛盾。不過都好難怪煲呔嘅，特區政府過去一年都確係乏善足陳，唔通叫佢憶述番慳電膽計劃嘅「德政」，講番自己點樣三兩下就團結到成個香港咩？