劉曉波被中央「以言入罪」，夾硬話佢顛覆國家，重判11年，點唔令人髮指？難怪喺重慶求學嘅香港學生樊俊朗都喺校園張貼大字報聲援，贏得唔少掌聲。原來今年9月先至北上就讀西南政法大學民商法學院一年級嘅樊俊朗，中學時代做過校園記者。身兼天主教正義和平委員會幹事嘅葉寶琳，當年幫民陣搞7.1大遊行時，就曾接受樊俊朗訪問，其後仲同樊同學用msn保持聯絡。葉寶琳噚日睇報紙見到樊同學嘅行動，覺得一啲都唔出奇，因為印象中樊同學雖然立場親北京，又參加過民建聯活動，但係真心希望中國進步，據知樊同學過去都曾經積極參與反日示威，係愛國青年一名。