前日拆禮物日，利物浦躉終於拆開球會季前帶畀佢哋嘅禮物––價值2,000萬鎊（約2.5億港元）嘅阿古蘭尼。當日紅軍贏狼隊2:0場波，係佢首次喺英超踢正選，結果呢位曾被譽為羅馬「王子」最佳接班人嘅仁兄，學足托迪，不過得其形似無其氣韻，有托迪嘅浮誇但就冇人嘅實力，表現同身價不相稱。呢份禮物，怕且紅軍躉唔收貨。
紅軍以眾凌寡屠狼
呢場波唔單止係阿古蘭尼第一次英超踢正選，仲係佢加盟紅軍以嚟落場時間最長（85分鐘）嘅一仗，畀足時間大家睇辦。平心而論，好幾個外國網站賽後畀佢嘅評分唔差，但以一個被視為救星，作為頂替沙比阿朗素嘅貴價貨，大家對佢嘅期望自然較一般球員高。睇佢幾次賣弄腳法好睇唔好食，或甚好幾次傳失波嘅表現嚟講，唔知紅軍躉係咪更加懷念沙比阿朗素呢？
講番場波，之前對強隊曼聯採放棄政策排弱陣嘅狼隊，呢場對紅軍就竟然排最強陣（唔通唔將紅軍歸類為強隊？），踢落紅軍係就係有個勢，但上半場老鼠拉龜，加埋人家門將夏尼曼有水準，結果由謝拉特、班拿約喺下半場中段各入一球，至成功屠狼。
球證畀牌擺烏龍
原來紅軍入波之前有段古，話說狼隊左閘史堤芬禾特喺52分鐘踢低班拿約，計正要兩黃變一紅出場，不過球證馬連拿唔知係咪受旁證影響，透過對講機傾完偈後將黃牌畀咗比拉，反而史堤芬禾特就冇事。紅軍球員唔發晒癲至奇，門將連拿跑足80碼衝向馬連拿投訴，結果後者再同旁證傾完偈後肯修正，趕史堤芬禾特出場。
馬連拿近年吹親利物浦嘅比賽，紅軍都唔輸，而利物浦上次贏曼聯，佢亦趕尼曼查維迪出場，都算係紅軍福星。今次整齣咁嘅鬧劇，唔通趁戰局悶悶哋，喺節日搞氣氛？