夠Car事：平掃水貨車　最後召集

「年尾換車」一向是車主的購買習慣，舊年仲可以見到代理劈價促銷存貨，不過今年呢種促銷行動幾乎成為絕響，代理好生意到估佢唔到，無存貨需要劈價求售。買唔到割價行貨車，水貨車一樣有得諗，事關好多做水貨嘅車行年尾都會促銷套現，過萬元的減價空間，一定畀到你。

記者：趙慧敏
攝影：梁細權、趙慧敏

今年減價空間細

「一般年尾係車行賣車高峯期，但今年就靜晒。」左軚汽車商會榮譽會長黃國權不諱言，今年車行無特別促銷，除咗經濟好轉，亦與代理入貨時較謹慎，令年尾積存的貨量減少有關。「經過舊年要錢唔要貨咁促銷，見過鬼仲唔怕黑咩，加上今年日圓滙價大幅上升，入貨梗係要小心啲。」黃國權說，由於現時入口水貨車的多是中小型車行，車價較有彈性，減幅相對稍高，不過因為整體市場情況與舊年截然不同，今年大幅減價一定不會存在。「如果你發現架水貨車不合情理地低過市價，咁就真係要小心。」
即係話，要在今年年尾搵平車，揀水貨車會較有機。買得水貨車，款新之餘當然最好有埋獨特之處。下面呢幾部，是否合符你心水？

黃國權

SkylineCrossover　好劈SUV

在跑車之中，SkylineCrossover今年明顯成為異類，它雖然還保留Skyline強勁引擎，卻增加SUV玩車樂趣，高性能的SUV市場，似乎已成為潮流新趨勢。新車配用日產最新3.7公升V6VVEL引擎，擁有330匹馬力和36.8kgm扭力輸出，輔以一套7前速半自動波箱作搭檔，性能毋庸置疑。令人耳目一新的是，SkylineCrossover配備一套360度全方位泊車系統，同時更可選配偏離行車線警告系統、靠近前方車輛警告裝置等配備，安全性大大提高，加上流線的外形，以及一對AFS大燈連霧燈組合、鋁質車頂行李架、前後十八吋專用合金胎軨等配襯，完全合乎辣車要求。