唔知點解，好多朋友都鍾意揀年尾拉埋天窗，敏妮就有個朋友星期五聖誕節當日擺酒，一班朋友唔使諗約去邊度慶祝聖誕，一於結婚喜宴同埋Christmasparty一齊搞。席間又有另一位朋友靜靜雞同敏妮公佈喜訊。
靜靜雞嘅原因，係因為呢次係佢再婚之喜，所以佢選擇低調一啲。不過，敏妮同佢嘅家人有同一反應，「咦，乜你終於同前夫搞好離婚手續嗱！」有此一問，係由於佢同前夫一齊夾錢買樓，屋企裏面嘅家具、電器，又係兩個都有出錢，佢哋仲開咗聯名戶口，雖然兩個人分開之後，再見亦是朋友，但兩個人都嫌麻煩，一直冇處理資產分配嘅問題，亦冇正式辦離婚手續。
其實家具電器，甚至聯名戶口相對容易解決，好似家具電器咁，大不了放上網賣，大家分錢。至於聯名戶口由於有進支紀錄，加上過去幾年銀行存款利息唔多，按紀錄分配即可。最大問題係層樓，本來賣咗分錢就可以解決，但大家對樓市有唔同睇法，又大家都驚睇錯市，所以睇好嗰個，即使有信心層樓仲會升值，都唔敢貿貿然買埋另一半。至於睇淡嗰個，一直都開唔出究竟幾多錢先肯賣。
須商討財務安排
結果兩個人分開後，協議將物業出租，扣除開支，大家平分租金收入。不過，現時各自有新嘅伴侶，始終要處理離婚嘅財務安排。敏妮記得，之前都喺專欄提過另一對離婚夫婦，又係要面對財務安排。如果敏妮話，即使係夫婦都要財政獨立，相信又會俾人話好mean。
敏妮仍然建議呢位朋友，同前夫一齊搵位中立嘅理財顧問，商討財務安排，正式辦離婚手續。至於新一段姻緣，就要學懂財政獨立。識唔識學乖，係佢個人選擇，當然敏妮都希望個個白頭到老！
溫敏妮