股份股價狂升，背後可以有好多個理由，其中一個理由係「貨源歸邊」。當然，用得呢個理由去解釋，有關股份貨源當然係集中於幕後手上，正所謂盡收天下兵器，任幕後點舞都得。
相反，若然貨源分散於散戶手中，就要祝君好運。事關派到周街都係貨，幕後通常會壓價慢慢來收集，迫令散戶投降沽出，直至收夠貨才開車，咁搞法試問股價點升？
今年新股上市十分熱鬧，鍾意炒新股之散戶可以炒餐飽，年內唔少新股大升，除了新股並無包袱，可以唔跟隨大市升跌，在大市吹淡風時逆勢炒上之外，另一個原因就係炒貨源歸邊。
好似上市冇耐的中國玉米油（1006），亦係一隻貨源集中的股份，其股價上市後雖一度跌近4元水平，但於上周聖誕假期前開始發難，平安夜當日更急升逾9.3%，收報5.18元，相信高位尚在後頭，目標價5.80元。
除貨源歸邊外，玉米油本身業務亦擁有領導地位，其食用玉米產量佔內地總產量30%，而公司上市集資所得將用作擴大產能，以鞏固業內優勢。
方星俠