一連幾日聖誕假，財爺好勤力寫blog，噚日一口氣貼咗兩篇文上網，一篇悼經濟學大師薩繆爾森（PaulA.Samuelson），話當年喺MIT都聽過佢講課，另一篇就梗係講預算案。鬍鬚曾話，聖誕假本想睇吓書充吓電，但個心總係放唔低份預算案，盤算緊點落筆。佢話早排同立法會唔同黨派議員舉行咗諮詢會，元旦後就會見工商、專業團體，稍後仲要落區。
話派糖唔係解決方法
宣傳方面，除咗嗰個鬼祟現身聽意見嘅廣告之外，下月中佢又會學舊年一樣，推出漫畫宣傳預算案，故事仍然係嗰條時空旅行嘅舊橋。其實呢啲都係門面嘢，講到內容，鬍鬚曾就實行「期望管理」，話雖然印花稅同土地收入不俗，但預計本年度赤字仍然高達400億，又話派糖唔係解決問題嘅方法，等大家唔好有咁大期望先。