正所謂「上山容易落山難」，而「上得山多終遇虎」，呢兩個現象正好形容內地A股市場的畸形生態。由於暫時仍只許買上，不許沽空買落，加上有每日升跌停牌機制，規定主板公司股價單日波幅不能超過10%，這幾個因素加起來，反而令股價更為波動，而且只准買上，令市況易升難跌。相反每當股市見頂回落，就有如於山頂遇上老虎乸，但每日只准行落10%，結果導致人踩人的悲劇，一次又一次上演。
只容許炒單邊向上，無非是想穩定市場，所以股指期貨研究多年一直未開通。炒開安碩A50中國（2823）的朋友不難留意到，每當內地股市見頂回調，資金總會積極向A50嘅Put輪或認沽證埋手，因為呢個係內地投資者唯一可以直接沽空A股，高槓桿而又避開畀印花稅嘅低成本對冲捷徑。難怪業內人士笑言，一旦股指期貨開通，投資者有咗合法沽空途徑，對發行商會是極大打擊。
蟹貨多宜嘆慢板
內地傳媒近期吹風，話由於創業板初部成功實施，明年第一季股指期貨將會正式推出，為中國邁向成熟市場再跨前一大步。過去兩年，多間包括中信、海通、國金、中金等證券公司，大多進行了模擬操作，全國164間期貨公司已納入統一系統，技術上已配合得天衣無縫，而中證監的中介人發牌工作亦已初部完成，可謂萬事俱備，只欠東風。
據了解喺測試階段，一張滬深300指數期貨合約成本要成20萬元人民幣，而且要畀18%保證金，係內地咁多商品期貨交易費中最貴，比炒期金嘅15%仲要高。市場估計，將來股指期貨市場主要交易對手來自機構、基金等大戶，用嚟做對冲，預料喺指數走弱時唔使吓吓沽正股，反而有助維持股市發展更健康有序。
除咗股指，下年重頭戲仲有國際板，都係利好券商股。目前內地三強鼎立，依次係中信、海通及光大證券。海通入股大福證券（665），消息消化晒冇乜水位炒。光大控股（165）持有33%光大證券，同6.23%光大銀行股權，股價跌到現水平合理得多，但由於蟹貨多，投資者要吸只宜嘆慢板。
胡孟青