劉曉波被判刑，深圳河以北至羅湖橋以南都掀起一股投案潮，喺內地聲援劉曉波嘅人士更加係以身犯險，堅過美利堅。身在香港，我哋冇理由唔把握僅餘嘅言論自由，繼續發聲，尤其係事關香港民主嘅補選公投。香港插畫家盧熾剛「咳神」（Cuson）就透過畫筆做嘢，佢嘅《五區公投》漫畫喺聖誕日宣告完成，旋即吸引大批網民轉貼。
咳神嘅插畫同漫畫相當受歡迎，但過去多數畫生活化嘅題材，好似一系列講佢同老婆之間趣事嘅「港女」老婆漫畫，港男好有共鳴。行年38歲嘅咳神噚日同八方講，今次畫政治漫畫，因為佢本身都係社民連支持者，舊年選舉都有幫社民連畫嘢，但就冇入黨。
解釋總辭及公投理念
喺香港土生土長嘅咳神一直支持雙普選，好多年嘅7.1遊行都有參加，今次主動幫手，宣傳五區公投，都係想為香港民主出一分力。《五區公投》漫畫封面自然以準備辭職嘅五區代表做主角，長毛、大嚿、毓民、袋巾同陳淑莊嘅造型都幾神似。內容就梗係解釋五區總辭、補選公投背後嘅理念，仲透過泛民中人好似阿基、華叔、何俊仁咁，提出不同嘅質疑，被毓民、陶君行、長毛等一一義正詞嚴咁「解答」。
最搞笑嘅一段係，畫中一位貌似白鴿黨張文嘅人物提出反建議，話不如仿效柏林圍牆倒下20周年嘅紀念活動，將歷代港督同特首嘅照片，以及所有功能組別嘅名稱排成骨牌陣，推跌所有骨牌之後剩番最後嘅一張就寫住「普選」兩隻字，寓意爭取雙普選，社民連五子即刻滴汗O嘴。
雖然部份漫畫情節攞民主黨人嚟開玩笑，但相比現實中早前大家拗到面紅耳赤，都算係適可而止。咳神話，都問過社民連意見，大家都認為家無謂再返轉頭講番早前嘅爭拗，焦點應該係向前看，推動五區公投嘅理念。
成為漫畫主角嘅陳淑莊就話，畫中佢嘴嘟嘟咁幾神似，但近日佢電咗髮，造型有啲出入。陶君行就話，漫畫情節社民連完全冇干預，係作者自己嘅構思，但稍後佢哋或者會印成宣傳品，推動公投。
mailto:[email protected]
