一位長期讀者阿峰來信問：「讀生果日報多年，每日必讀GG細語與黃金冒險號，先生之粵語傳神，雖三蘇老仙再世，亦不遑多讓。」嘩，嚇死，千祈唔好咁講。左丁山自細路識睇報紙之時，已追讀三蘇怪論與小生姓高，視之為偶像，自己點可以同佢相比，現在以廣東話寫稿，乃膽粗粗向高先生偷師而已，焉敢與佢相提並論。聽韓公講過，三蘇一路打麻雀，一路寫稿，寫稿如車衣之快，呢門絕藝，可說空前絕後，至今寫稿界無人能及。有啲近似嘅，就係陶傑啦，佢隨身攜備紙張，有老友見過佢在地鐵車廂內寫稿，又見過佢在上海街頭，是但搵張櫈，一坐低就埋頭寫稿，速度之快，令老友嘆為觀止，至於質素如何，讀者見到晒啦！
阿峰講到機電署維修白車救護車不力，上斜路冇油，被裁判官批評一事，有以下評論：
「本人業汽車業多年，由數十噸之重型貨車至普通私家車，其油箱之構造基本一樣，就是由油箱導往引擎油杯之出口，汽車工程設計師的設計，一定把出口開在靠近車尾這一邊，這就是避免汽車上斜路時，由於車頭上仰而不夠油食，所以說如果汽車之油箱真係不夠油的話，它只會在落斜路時跪低，此通識也。」
阿峰講得如此簡單，何解機電工程署唔識，待考究。左丁山乃機械盲，識揸車唔識修理汽車，換胎都不知如何入手，任何時間架車行唔郁嘅話，只會打電話搵大偈Ｋ。好彩揸車多年，只試過一次在路面死火啫。大抵每過半年就叫大偈Ｋ檢驗老爺車一次，所以長期冇乜事，政府白車嘅功能十分重要，竟然會在路上死火，乃不可接受之事。
名牌汽車老總話左丁山部七人車係老爺貨，已經絕版，老早應該換車，但啲產品多數係二千幾cc，坐滿七個人上斜路，唔夠力，而且內櫳比較窄。老總及其他朋友大力介紹兩款明星保母車，但咁大架，唔搵司機唔似樣噃，一闊三大，只合明星、議員及廠家招呼客人，建築邦介紹一部三千cc新款七人車，聽到心郁郁，最後都係請佢買咗用一年先，之後再以舊車價賣出嚟！