鄭秀文（Sammi）前晚請來兩位銀幕情人做個唱嘉賓共度聖誕，她自爆其中一位曾與她拍過兩次拖，該人便是鄭伊健。其實伊健與Sammi的戀情只發生在電影《百分百感覺》中，加上葛民輝這位銀幕初戀情人，Sammi開心得與他們重演戲中的人肉三文治場面。
鄭秀文前晚聖誕夜在紅館演出第二場個唱，她自嘲乾涸中女，乾得像撒哈拉沙漠，不過這個聖誕卻不寂寞，打孖有兩位男士相伴。Sammi在台上說：「呢個人我同佢拍過兩次拖，可惜都冇結果，佢家有新女朋友，唔要我喇。」說罷現場奏起電影《百分百感覺》插曲《問我》，Sammi兩位銀幕戀人鄭伊健及葛民輝拿着沙槌上台，惹得全場觀眾尖叫不停。
「發覺佢真係好dry」
伊健、阿葛和Sammi緬懷過去一番，阿葛笑說：「聽講Sammi乾過撒哈拉沙漠，我哋特登打孖上畀啲愛情滋潤佢，記唔記得當年喺戲入面玩過人肉三文治呀？我想喺呢度重演呀。」Sammi聞言大笑並謂確實需要點滋潤，然後抱着伊健，阿葛再從後熊抱她，搞笑地上演人肉三文治，引得全場捧腹。
後來Sammi落台更衣，阿葛即玩踢爆：「頭先攬住Sammi，發覺佢真係好dry，dry到冇人幫佢擦背，因為佢噚晚用嚟貼咪嘅膠紙印仲喺度！」阿葛又發揮搞笑本色，問觀眾上周有否欣賞鄭伊健演唱會，大家是否憑同一張門票入場，伊健笑說：「只要係林建岳搞嘅演唱會，大家都可以憑同一張飛欣賞。」然後宣佈鄭伊健友情歲月演唱會part2正式開始，阿葛接着說：「Sammi唔使換衫喇，可以叫八折的士返屋企。」二人合唱《友情歲月》，並與觀眾握手，全場情緒高漲。
歌迷聖誕唔肯走
由於前晚是聖誕夜，觀眾欲在節日盡興，完場時都不肯走，狂叫Sammiencore，Sammi遂上台清唱幾句《唯獨你是不可取替》，她笑說：「我準備換睡衣o架喇，所有歌都唱完喇，聖誕快樂。」演唱會才正式結束。
撰文：丁寧