古有木蘭花，今有鐵欄花。被喻為香港特區真正管治班子所在嘅西環總部，前日發生一起衝擊辦公大樓事故，示威者意圖喺大樓鐵欄上綁絲帶，又大叫口號，結果一一被門口女保安化解。呢位英雌見一條絲帶剪一條，仲表明共產黨員身份，當面斥喝示威者「去死！」、「仆街！」勇退一班顛覆西環嘅分子。
女保安大戰示威者
中國異見人士劉曉波前日被重判之後，一批示威者操去中聯辦抗議，示威者一度突破封鎖，衝入中聯辦大樓範圍，同保安人員發生衝突，其間一名女保安員大發雌威，堅定不移咁維護咗西環嘅穩定。
以獨立中文筆會會員身份參加示威嘅蔡詠梅憶述，佢哋喺中聯辦嘅鐵欄上綁黃絲帶，表達期望劉曉波早日獲得自由嘅心意，點知有個女保安早有準備，示威者綁一條，女保安就用鉸剪剪一條，其中一位示威者用手護住絲帶，女保安都照剪可也，剪傷示威者手指。衝突事件有人報稱受傷，港島區重案組介入調查，暫無人被捕。
呢個時候，示威者情緒高漲，蔡詠梅大嗌咗句：「打倒共產黨！」女保安即刻以濃重北方口音廣東話還拖：「你去死、你仆街！」蔡大姐被佢嚇窒咗，咗啖口水之後問佢﹕「我鬧共產黨，關你乜嘢事？」女保安義正詞嚴咁教訓佢：「共產黨就係好！」示威者鬧佢為虎作倀係走狗，佢終於忍唔住表露身份：「我就係共產黨員。」
疑似黨員應感慚愧
唔怪之得呢位女保安咁英勇保衞西環，原來佢擁有咁特殊嘅身份。正所謂：智勇雙全膽又壯，生平嫉惡更如仇，呢位姓周嘅女保安勇退示威者有前科；上年一批法輪功學員去西環示威，小周都試過出動雨遮同示威者對峙，死口唔認係黨員嘅疑似黨員梁振英、曾鈺成，面對小周，真係應該感到慚愧！
新華社前日發稿譴責示威者，其實應該同時表揚呢位神勇女保安小周同志，聘用周同志嘅安民警衞，都應記一功。安民警衞深得政府器重，承包多個公屋保安合約；安民董事李林泉係退休警務處高級助理處長，至於李sir手下仲有幾多共產黨員，八方相信佢自己都未必清楚。
mailto:[email protected]