被戲稱「查死你們」嘅中證監前副主席查史美倫係財金界鐵娘子，但原來都有俾男人呃嘅時候。佢現任大學教育資助委員會主席，接受《周梁有請》訪問時透露，當年做教育局局長嘅李國章搵佢做教資會主席，話每年只係開三次會，查太覺得唔太花時間就應承，點知李國章講一半唔講一半，原來每次開會要兩個星期！
傳接任港交所主席
家李國章淡出江湖，查太暫時冇仇報，接任教資會主席幾年，佢覺得本地大企業捐款大學嘅文化遜於外國，可能同香港獨沽一味發地產有關，而地產要求嘅科研又唔多，所以地產公司亦冇乜意欲捐錢俾大學，好彩地產富豪捨得捐啫。
不過豪捐都唔一定受歡迎，李嘉誠捐10億元得到港大醫學院冠名事件爭議至今，查太話對此感到不可思議，因為英、美大學捐錢冠名十分普遍，理所當然，「我都唔明點解學生、教師有咁嘅意見。」江湖傳聞查太會接任港交所主席，佢話唔到自己話事，最好多啲時間抱孫。