對於唔少香港人嚟講，車係奢侈品，當然唔會只係要求代步咁簡單。除咗講求性能，高層次啲，仲要有埋配合車主嘅個人風格。要啱款式不特止，顏色、裝飾都最好夠晒特色，獨一無二就最理想。要咁有代表性，當然就唔可以淨係用錢買，用腦筋、花心思，點都唔少得。好似呢兩部人氣車仔bB咁，就大玩色彩，加埋別出心裁嘅閃爍效果，不一樣嘅華麗感出晒。
記者：趙慧敏
攝影：梁細權
Model：Mandy@PureModels
呢幾年喺眾多車款中，喺外觀上最有改裝潛質嘅，非盒仔車bB莫屬。咪睇佢成架車正正方方，就因為佢夠簡約，空間感又大，簡直可以發揮年輕人無限想像空間，想點改就點改。今日就一口氣出動兩部，一部「青bB」，全車一個Tone，先聲奪人夠氣勢。另一部外觀黑色玩低調，但內櫳就撞姣爆鮮橙，出人意表。兩種玩法，一樣演繹浮誇風格，你Buy邊種？
徹底「青bB」
先睇「青bB」，外殼顏色已經一絕，車主將原來銀灰色外殼大變身，車身上半截噴成青色，下半截則噴成綠色，驟眼看已經有幻彩嘅效果。咁仲唔止，水晶粒逐粒逐粒咁貼上鬼面罩，加上車頭冚及鬼面罩都用上大量電鍍裝置，簡直令人「眼前一閃」。玩改裝，咁當然唔止咁簡單。加上超低頭唇及裙腳，仲有四個刀片式胎軨，外形Cute之餘，竟意外地有一股惡相。
內櫳一樣貫徹「青bB」格局，白底綠邊座椅套，齋睇都覺勁舒服。至於錶板，音響格外殼都全屬青綠配搭，最搞鬼係車身內櫳及車門板全部噴上青綠色。不過別以為清一色嘅綠就毫無配搭可言，事關運用巧妙嘅水晶擺設，便突出整個顏色佈局。青綠色咕車頂中間配置一頂水晶燈，錶板上圍上水晶粒，倒後鏡有水晶吊飾，置身其中，猶如幻影世界。可能車主認為抱住要玩就要玩得徹底嘅想法，竟然連引擎、頂Bar等都噴成青綠色，不得不回敬一句：「使唔使咁誇張呀！」
外觀低調內裏超姣
再睇番部黑bB，外形就顯得相當低調，而係集中火力，喺內櫳大玩顏色戲法，用鮮橙嚟同黑撞出驚喜。單看外觀，除咗橙色嘅胎軨外，你可能會稍嫌它平實，但由打開車門一刻，絕對係內有乾坤。橙色內櫳及門板自然唔少得，黑色咕車頂巧妙同車身顏色呼應，水晶配飾一樣唔少得，一盞水晶吊燈點睛，坐喺車廂內，簡直以為自己身處皇宮。
最搶眼位要算司機位，別出心裁嘅白色軚盤配橙色錶板位置，效果相當唔錯，亦十足個人風格，難得車主連按扭都照顧周到，全部換上水晶。要有舒適屋企Feel，梳化椅套唔少得之外，仲有一張小小嘅茶几，加埋bB寬敞嘅內櫳，真係喺度瞓番半日都好嘆。
