全球機迷爭做網上車神

記唔記得《烈火戰車》有句經典，「喺街砌得幾叻都無用，有本事就落Track鬥！」Track鬥？喺屋企都得！《GT5》試玩版剛登場，今次唔係打機咁簡單，玩得叻嘅，仲有機會被揀卒進入真實賽車世界嘅GTAcademy，開展現實中車手之路。

記者：徐影龍

畫面一般聲效震撼

GTAcademy係培育新一代賽車手嘅機構，舊年就出咗個LucasOrdonez，今年已正式加入日產車隊，成為職業車手。新一輪GTAcademy活動又再開鑼，今次用上剛提供免費下載嘅《GT5》試玩版作甄選淘汰，全球機迷將以最快圈速PK互鬥。
PS3試玩版檔案只係204MB，好快Download完。正式進入遊戲，老實講，畫面只算不過不失，一啲反光位同材質貼圖都未如理想，但聲效卻相當出色，支援DTS5.1、PCM7.1，開埋低音喇叭聽引擎聲，絕對有鬥真車嘅氣氛同感受。

■試玩版畫面無想像中咁靚，但聲效一流。

改裝370Z較好操控

由於今次係日產嘅活動，所以只得一架市售版同經改裝嘅Fairlady370Z揀，賽道亦只得IndianapolisSpeedwayGPCircuit。咁都好，起碼可專心操熟一車一賽道。為熟習賽道，起初不求極速，只求完成圈賽，不過370Z比想像中更易打滑，改裝版操控稍為容易一點。以為揣摩到少甩入彎技巧，會有好成績，睇番網上排行榜，卻排到6千幾名。無錯，甩尾入彎好睇唔好食，咪被《頭D》誤導咗。想提升圈速，一定要堅守Out-in-out嘅攞位、慢入快出先得。一輪下來，筆者目前綜合排位（普通＋改裝）1,818名，有空閒再突破自己成績。唔使急，反正比賽到下年2月16日先完結。

■車內視點栩栩如生，勁好Feel。

■PS3遊戲《GT5》試玩版，香港PSN都有免費下載。

■兩種級別370Z都有相關賽事，規格同輪胎都唔同。

■紅色為普通版370Z，黑色有大尾翼就係改裝版。