聖誕放假幾日，你又玩足幾多日？相信，今日大家都會選擇休息平復一番。呢段時間做乜好？當然係好似趙碩之咁，煲碟懶住睇；佢仲會推介3套戲畀各位，星期日就算唔出街，都唔怕悶親！
記者：陸俊雄
攝影：林栢鈞
Hair︰GuardiKo@04
聖誕必備
若遇上大女人，反過來要男友遷就的，趙碩之推介實無死的《LoveActually》，「呢套舊作可以話係聖誕必備，無論你翻睇幾多次，都總有段感情Touch到你。」而且今次趙碩之講的新藍光版，其實只係出了約兩至三個月，係無刪剪三級版。好奇怪，無諗過佢係三級呢﹖「事關香港上畫時，係少咗一段講AV演員嘅愛情故事。」這當然係因為有裸露鏡頭，但唔會影響到成套戲變成淫戲，一樣咁Warm。
D9新鮮
如果同男朋友二人世界嘅，趙碩之覺得可以就吓男方，陪佢睇睇科幻片，本周就有隻《District9》可以考慮。「話晒係魔戒大導PeterJackson所拍，同埋我覺得啲外星人好似隻蝦咁，又怕人打，感覺幾新鮮。」相信名牌？不過唔少網友話個劇情唔多得。其實真係好睇你用咩心態去睇，無人話過一定要好似《異形》咁，「如果唔係，都唔使搵PeterJackson喇，外星異形都可以好可憐，個男主角最後仲……好慘！」爆埋劇情仲使睇？趙碩之即改口︰「唔好意思，留番大家自己睇。」
至於畫質上，此片亦不是以靚畫作賣點，因唔少場口都拍得像新聞報道直播，係有心加Noise。而音樂包圍感方面，直升機出現的時候，做得不俗，只要不要抱住長時間子彈橫飛的心態來睇，不會失望。
老少咸宜
同男女朋友睇的都有了，係時候介紹隻一家大細可以睇的，趙碩之首選係《UP》，「顏色靚唔在講，人同動物啲毛髮真係太逼真，阿伯把頭髮仲順過我。」的確，無論頭髮、眉毛、狗、雀鳥、衫的紋理等，呢隻碟可以話係示範碟，加上顏色豐富，對白抵死，大人小朋友同樣受落。趙碩之最尾仲話，「我好鍾意阿伯同埋童軍仔個造型，一個方、一個圓，好得意。」有眼見，用來女仔又係唔錯。
