年尾又是樂壇派成績表的日子，今年出道的新人無不緊張，bma旗下實力唱作新人余翠芝（Chita）亦相當好奇自己有無獎，今日跟我們到樓上cafe，吃個蜜糖雞嘆杯朱古力之後，再搵埋占卜師開個盤、占個卜，看看能否成為2009新人王！
記者：梁美甜
攝影：譚盈傑、楊錦文
至讚蜜糖雞
N年前，不少樓上cafe都有占卜師駐場解讀塔羅牌等，近年已少見，有駐場占卜師而食物具水準的餐廳更是少數，CafeZense是其一。間中都上樓上餐廳聚會的Chita，鍾意音樂、亦愛嘗試新嘢，坐下來，Chita一個人吃掉整個風乾番茄黑欖西洋腸意粉，見到墨西哥雞肉芝士餡餅更直言「我超鍾意食雞，雞肉餡啱晒我！」掃完一大件後，又一口氣吃掉一串蜜糖芥辣雞柳串，並大讚好味。如此吃得又吃得不造作，可見Chita之率性大方。問她可有信心得獎？「非常有！其實可以出到碟已經好幸運，自己花了不少心機做，市場同歌迷反應好，好開心；可以得獎，就更開心！」
請駐場印度合一大學祝福傳道師Nancy以奧修禪卡（奧修禪宗塔羅牌）為Chita解讀年尾樂壇頒獎禮成績時，結果是，No-thingness！「呢張『no-thingness』牌可以話未必如你所願，但亦有驚喜，結果亦可以無限，最重要是『Thefool』牌顯示就算無獎都唔見得你會好失望！」樂觀積極的Chita點頭認同：「如果真係無，或者會提供更大嘅創作空間俾我去作曲做音樂呢！而且無話真係無，話唔定真係有surprise呢！」
風乾番茄黑欖西洋腸意大利粉$62
意粉煮得aldente，彈牙爽口，加入葡式臘腸、意大利黑欖及風乾番茄等調製，醬汁鮮香好味，份量足。
蜜糖芥辣雞柳串$38
雞柳以Cajun香料醃過，入味非常，配以法國粗粒蜜糖芥末醬烹調，肉嫩惹味。
墨西哥雞肉芝士餡餅$58
餡餅烘得奇脆無比，內釀滿雞肉、芝士、洋葱等，外脆內軟。
Nancy（印度合一大學祝福傳道師）
本身是能量治療師，除塔羅牌，更以奧修禪卡為人解讀，解讀卡牌年資近10年。
駐場時間：星期一、二、四、五4pm-10pm/六、日須預約
收費：惠顧餐廳$200以上（$168/節）、$100-$200（$188/節）、$100以下（$208/節）以塔羅牌或奧修禪卡解讀服務，每節15mins。
卡牌回應Chita的結果是：
No-thingness，黑色牌一張，解說為，表面無，但又具無限可能。
CafeZense（28922249）
銅鑼灣駱克道468號鑽石大樓2樓
例湯日日清
Arousal原先由幾個年輕小伙子經營，上個月才轉由阿東走馬上任，餐廳主打日、韓飲料及輕食，飲品多達50款！飲，重要；吃，更重要，一道登爵尼斯蟹已經叫人垂涎，屬法國睡蟹的登爵尼斯蟹，約一磅重，打開蟹蓋，見滿滿青色蟹膏吸引得很，肉甜膏香，嗜蟹者必愛。Cafe最得女孩子歡心的，竟是一個例湯！小店無紅湯白湯的選擇，獨沽一味供應紅番茄忌廉湯，將新鮮材料打爛混合調味烹調而成，師傅話無下過任何海鮮，但呷一口，口腔總有一朕如龍蝦湯的鮮香，超過癮；微酸的湯頭加入即煮彈牙通粉，開胃好味又飽肚，難怪例湯日日賣個清光！
登爵尼斯蟹$228（須早一日預訂）
法國睡蟹，約一磅重，製法有點像潮州凍蟹，師傅先將蟹烚熟再雪，最精采是蟹殼上滿滿的蟹膏，不若一般紅噹噹，青青的卻鮮味濃郁。
紅番茄忌廉湯通粉$36
餐湯以鮮番茄、忌廉、牛奶、雞蛋等打茸再煮，出奇地滲出淡淡海鮮味，加入即煮彈牙通粉或意粉，美味！
呍呢拿燉蛋$28/1人份$68/5人份（需時25mins)
即叫即製，面層是薄薄的蛋白，下面是厚厚燉蛋，焗後蛋香滿溢。可指定要全蛋白或揀多款味道如呍呢拿等。
小慈（塔羅牌占卜師）
占卜年資達8年，顧客包括明星藝人。
駐場時間：每晚9時後或預約
收費：惠顧餐廳，第一條問題心意價，頭兩條問題$80，第三條開始每題$50。
Chita得好牌
今年女新人眾多，從網上熱門討論及支持度中挑選九位讓小慈占卦，睇睇邊位將取得樂壇新人獎，結果是Chita、麥家瑜、唐素琪、徐子珊均取得好牌，有機會於新人獎上爭一席位。
ArousalCafe（25763211）
銅鑼灣禮頓道2號2樓2A室
