南華昨午在香港大球場上的高級銀牌8強，下半場連入3球，以3:0大勝大中晉級。雖然「香港足球先生」李威廉射入加盟南華首個入球，但論鋒芒仍被梅開二度的「陳七」陳肇麒所蓋，這位人氣球星過去3場轟入6球，入球停不了！
南華與傑志在聖誕節正日分鬥大中及四海流浪，只吸引到2,537名球迷入場，購票人數1,767人，場面較預期冷清。
李威廉入南華首球
南華尾場鬥大中於上半場陷苦戰，若非大中的國援守衞燕鳴昊勁射中柱，南華半場可能先落後；易邊後，大中防守中段突然失去集中力，李威廉在67分鐘近門射入效力南華的首球，而陳肇麒在84及86鐘梅開二度，在場的球迷齊為這位近期紅到發紫的球星的精采入球而歡呼。
「陳七」自月中在英超熱刺跟操回歸後，合共比賽3場，在255分鐘內攻入6球，在甲組射手榜以6球與晨曦的陳耀麟及傑志的禾志利同踞第2位，僅落後公民前鋒辛祖兩球。由於入球停不了，賽後再獲足主羅傑承點名稱讚：「熱刺已回覆暫難外借球員給南華，但會介紹球員給我們，而短期內將繼續重用陳肇麒與此戰表現出色的李威廉等華將。」
「陳七」昨賽後表示，球隊表現不俗，希望繼續有波入：「近期腳風比較順，但現階段不會想做神射手，最重要幫到球隊贏波。希望威廉開齋後會越踢越好。」由於南華不派兵出戰省港盃，球員可專心應付下月3日作客對天水圍飛馬的聯賽大戰。
傑志淘汰流浪晉級
傑志在頭場以3:1輕取曾由樊偉軍扳平的四海流浪，建功球員分別為羅沙度、拿素爾及鄭禮騫。
傑志總領隊伍健賽後公佈禾志利離隊的消息：「禾志利的爺爺患病，情況不是太過危急，但他要求離隊返回祖家西班牙陪伴，會方接納其要求，並在西班牙或本地物色前鋒代替其位置。」
本報訊
甄馬田返港彈本地波
01年亞洲盃賽冠軍盃次圈首回合大演帽子戲法、幫南華贏日本清水心跳3:2嘅斯洛伐克中鋒甄馬田（左），趁聖誕假返港度假，同太太重返大球場探班兼睇波。退休後在斯國寶馬車廠任職嘅馬田，睇完頭場仲一臉失望，話本地波水平下降，冇乜好球員。
羅生頒支票畀紅十字會
大會特別安排喺頭場之後進行慈善盾支票頒贈儀式，將義賣今夏8月17日南華對傑志入場票同獎券籌得嘅善款，頒畀球隊代表嘅兩個慈善機構。南華足主羅傑承頒發333,334元支票畀香港紅十字會（圖）；由於傑志贏波，所代表嘅基督教聯合醫院協會得多啲善款，有50萬元。
兩個皮利斯撐皮利斯
大球場有3個傑志嘅皮利斯？原來只係25歲「2哥」嘅兄弟專登喺西班牙飛嚟香港，着住件4號傑志波衫打氣。34歲嘅哥哥Geni（右）同21歲嘅細佬Manel（左）雖然唔係第一次睇皮利斯踢波，但都好興奮，仲帶埋一班朋友撐場，認真畀面。
情侶戴聖誕帽捧南華
雖然係聖誕節正日，但全場都冇乜節日氣氛。足總喺頭場完上半場時播放聖誕音樂，不過選曲略嫌太柔和，聽到人好想瞓，可能見反應唔多好，之後都冇播落去。另外，之前有傳南華球迷會派聖誕帽畀fans，不過最後只有一對情侶（圖）預先買定嚟打氣。
