家啲潮人真係機不離身，身邊總有部iPod、MP3、MP4嘅隨身聽，呢幾日聖誕假期更加狂煲勁爆熱歌，但係家啲耳筒主打中高音人聲，忽略低音嘅部份，稍為聽rock啲嘅歌，啲聲好薄。有專門替日本等影音品牌做耳筒嘅本地環球音響國際公司，眼見過去經營30年都係替人作嫁衣裳，最近首次推出自家品牌嘅土炮低音耳筒搶奪市場。
特別適合聽R&B等
環球音響開發部阿頭Edward話，今次公司研發咗半年，成功炮製自家品牌Knights，頭炮係KnightsKE－100入耳式耳筒，賣點係動圈單元獨有嘅強勁低音分析力。家市面嘅品牌耳筒只着重中高音人聲，KE－100比一般嘅耳筒更能分析出音頻低過400HZ嘅訊號，其中包括低頻樂器如低音結他、低音鼓等，令音頻更圓潤同飽滿。
Edward話，KE－100特別適合聽編曲濃厚，拍子強勁嘅音樂，例如R&B、HipHop、J-pop或搖滾，係多重樂器組成嘅樂曲更能顯示出呢啲低音樂器嘅聲音，令音樂所有環節得到平衡同完整展現出嚟，「試吓用呢個耳筒聽吓平日愛聽嘅歌，相信會換上全新嘅感覺。」
講到咁厲害，小藍試聽吓，真係估唔到呢嗰耳筒仔嘅低音咁重，錐心嘅鼓聲出晒嚟。
Edward話，呢部土產耳筒賣199元，比一啲日本品牌耳筒平一半唔止。有興趣嘅可以去耳筒專門店亦軒耳機音樂世界試聽（電話：27706919）。